Udazkeneko azken bals geldoa

(Ardoarenak 39) Argazkiek dena adierazten dute batzuetan, eta zaila da haiei hitzak gehitzea. Estilo ariketa korapilatsua gertatu da Kripan, Lantziego eta Guardia ingurutan ateratako argazki hauen gainean idaztea. Nola deskribatu hitzez hainbeste gorritasun.

Uzta-amaierako dantzaldirako dotore jantzi dira mahastiak
hautsa kendu laba-arropei
dirdira eman koral-oinetakoei
atera bitxiontzitik herdoil-lepokoak
luzaroan aritu dira
hango eta hemengo edergarriak
arreta handiz
bilatzen
astiro
probatzen
janzten
eranzten
alkimia egokiz konbinatu arte
bukatutakoan
harrotasunez begiratu dute
bere burua ispiluan
hain laranja
hain magenta
hain granate
hain eskarlata
hain horail
hain arrexka
hain laru
hain okre
 
urazpiko sumendiren baten leherketa bezain ederra izango da
azken bals geldoa
mahastiek
baimenik eskatu gabe
gorritasunez
estaliko dituztenean lainoaren magalak
laranja-euriko
kalabaza-ihinzdun
dantza bakarra
une bat besterik ez
baina
mahatsondoek ez dute edertasun-alerik gordetzeko asmorik
biharko
estimatua dago egokiera
loaldia baitator
eta
begiak bildu  aurretik egin dezakegu  amets
 
esna gaudela
 
zertarako bestela 
udazkena
 
 
 
Kategoria: Ardoarenak Etiketak , , , . Gorde lotura.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude