(Ardoarenak 38) Speyer hiri alemandarreko museoan gordetzen dute munduko ardo-botilarik zaharrena. Bertan topatu zuten, ustekabean, indusketa batean. Erromatar bikote aberats bati, beste mundurako bidaian laguntzeko sartu omen zituzten, ardo-botilak, haien hilobietan. Duela 152 urte topatu zuten eta orduez geroztik daukate bertako museoan. Jakin nahi al duzu zer den zahartzea? Jarri botila horren larruan.
Jar zaitez munduko ardo-botilarik zaharrenaren larruan
1669 urte ditu
erromatar garaikoa da
eta ustekabean topatu zuten
patrizio bikote baten hilobiaren indusketan
orduez geroztik
adituek
botila ikusmiratu
aztertu
zaindu
zelatatu
kontrolatu dute
152 urtez zehazki
eta sekula ez dute
irekitzeko inolako asmorik eduki
hilezkortasunera iristeko modurik krudelenetako bat da
milaka urte ospitalean
aditu
ikusbera
ikerlari
eta
gogoz kontra eramandako ikasle-saldoen begiradapean
ajea
higadura
nekea
asepsia pilatzen
munduko ardorik zaharrena
betirako
lurrak kontrako norabidean lehenengo bira ematen duen arte
esadazu
nahiko al zenuke hainbeste hil
hain luzaroan
hain etenik gabe
hainbeste amore emanda
zientzialarien
medikuen
profeten aurrean
edo nahiago zenuke
lapur bihozberaren batek
legearen erabat kontra
gauren erdian
segurtasun-neurri guztiak gainditu
zaindariei iskin egin
botila eraman
ireki
eta lorategiko lur beltzean husteko adorea eta gupida bilduko balitu
galdetu al dizute inoiz
zenbaterainoko bizitza jasateko prest zauden