Zahato arriskutsuak

(Ardoarenak -8) Oso erraza eta etxekoia dirudien arren, gauza jakina da arrisku handiak dakartzala zahatoan edateak.

Zauri asko utzi dizkit zahatoak
alkandoran
baita
haren azpiko elastikoan ere
ardo egoskorra
zenbat utzikeria ez ote didate leporatu 
marka
arrasto horiek  direla eta
zabarkeria-dominak
 
batzuetan
ordea
deskuidua
ez da hain agerikoa izan
orbanak arropa igaro
eta larruak zurrupatu baitu
ardo tematia
haragia
eta haren azpiko organoak 
zainak
giharrak 
blaituz
abandonatutako hezur-meazuloak 
eta beherago
barne-muinetako isilpeko estepak 
hezetuz
azido-zingiretaraino jaitsiz
eta are sakonago
zelulen baten
habia ezkutuan
pausatu arte
 
horretaz ez dira jabetu
hainbestetan
hainbesteko grinarekin
hainbeste narraskeria
leporatu didatenak 
 
epelak entzun beharko ditut
hau irakurtzen dutenean
ia ezinezkoa da eta
barne-parajeak ongi garbituko dituen
detergenteren bat
eskuratzea
 
arroparekin errazagoa da
 
 
Kategoria: Ardoarenak Etiketak , , , . Gorde lotura.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude